1
باخیش
چهارشنبه 1 دی 1395
آشیق
بؤلوم | یازار : علی رشتبر«قاییب»
+0 به یه ن

آشیق

یئنه جوشا گتدی دویغولاریمی
کؤکسونده سیزلایان تئللی ساز عاشیق
گؤتوردو بیر آنلیق آرانا داغا
خیالیمدان کئچدی گوللو یاز آشیق

دالدیم بیر خیاله چیخدیم اؤزومده ن
اوبالار اویماقلار کئچدی گؤزومده ن
کیمسه باش آچمادی داها سؤزومده ن
سن اولدون اوزامان دیللی سؤز آشیق

یوخویا آپاردین بیر آنا کیمی
دولاندیم هر یانی پروانا کیمی
یایلاغدا سوزوردی بیر سونا کیمی
یاناغیندا قوشا خاللی قیز آشیق

اوغوزدان دومرولدن قازاندان دانیش
اونلاری سؤیله ین اوزاندان دانیش
حاق سؤزونو دوغرو یازاندان دانیش
عومانلاردا بیر دریندن اوز آشیق

گرایلیندا چیخدیم داغی دولاندیم
قوربتبن ده کئچمیش گونه قالاندیم
منصوری ده دورنا تکین تالاندیم
آغلادی اوره گیم یاندی گؤز آشیق


سنده خطایی نین قیلینج سسی وار
سنده کوراوغلونون نعره سی وار
سنده حقیقتین آغیر بحثی وار
حقیقت یولونوگئدیر دوز آشیق

قوربانی دن خبر دویدوم سؤزونده
علعسگری گؤردوم خوش آوازیندا
سنین نفسینده سنین سازیندا
کره مه چاتدیردی اصلی سؤز آشیق

دل افروز عشقینده یاخدین معصومی
غولام حیدر سئیدی او خان کره می
بزه کلی واختیندا او شاه سنمی
ائیله دین قریب له اوز به اوز آشیق



اودلار دییارینین جانلی قولوسان
تاریخینه گئدن دوغرو یولوسان
مقدس سن منیم اوچون اولوسان
زامانین قهرینه هله دؤز آشیق

ائل ایچینده گونش کیمی یانیرسان
هر زامان ائلینه آرخالانیرسان
«قاییب»این روحوندا سن دولانیرسان
قویموسان  روحوندا درین ایز آشیق


علی رشتبر «قاییب»

https://telegram.me/joinchat/CdC4V0DEo_qIJJ9l4LyVkQ